Rom 9 | KUD | STEP | Yawalo dumwalu alimiyai, yau Besinana baidagu na nigele yayaꞌoyaꞌoyama, neta yagu huhu Isileli vehabadi nuwagu iyababa mwalaꞌina, ainaena hauga bagibagilina ategu imuyamuya vehabadi. Yagu walomahalava teina Aluꞌaluwa Veꞌahihi ihanahanapui neta walo moiha.

Romans 9

Yaubada yana bodao Isileli vehabadi

1 Yawalo dumwalu alimiyai, yau Besinana baidagu na nigele yayaꞌoyaꞌoyama, neta yagu huhu Isileli vehabadi nuwagu iyababa mwalaꞌina, ainaena hauga bagibagilina ategu imuyamuya vehabadi. Yagu walomahalava teina Aluꞌaluwa Veꞌahihi ihanahanapui neta walo moiha. 3 Bada ebe vehabadi na Yaubada yana awayababa alonai yamiyamiya ta Besinana vehabadi iveꞌahagau ta hiya yagu huhuwo hivebesinana. 4 Wuwuna hiya Yudeyaone ivesinuwaidi ta hiya natunao yo aidiyai yana wasawasa iꞌabiye mahalava. Yana waloyemidi ipaihowa hiya baidadi ta Mosese yana loina imohedi. Hiya walovetuvehae moiha aidiyai yo Yaubada yana waloyemidi hivaiyaꞌo. 5 Babada mugamugaidi aidiyai, hiya dova Abelaham yo Aisake yo Yakobo na mulitai yadi huhu ainaena Besinana imahalava. Eeta ginauli teina vehabadi Yaubada ibom imwalaꞌi alili tawalo vetuvehae hauga maudoina. Moiha.

6 Nigele Yaubada yana waloyemidi iyabeꞌu wuwuna Isileli tomowadi maudoidi nigele Yaubada yana tomowao. 7 Eeta moiha, nigele Abelaham yana huhu maudoina Yaubada iyaꞌawa natunaedi, wuwuna Yaubada iwalo, ‘Yam huhuwo Aisake natunao ainaena’, mata nigele Aisake tahina ainaena. 8 Eeta teina ana nuwamasele iveꞌitagitaꞌo moiha ebeha Yaubada natunao nigele Abelaham yana huhu ainaena, na hesi Yaubada yana waloyemidi ainaena. 9 Wuwuna mwalona Yaubada Abelaham ainai iwalo yemidi, iwalo, ‘Howola abo hauga yawalowei ainai, yalau gwaipilema na natum towahona yamohego, mwanemne Sela ainaena’.

10 Na hinage dova tubuda Aisake Lebeka itawaholai, na natunao patubwau diyanai, 11 na mulitai abo Lebeka ilabalaba, Yaubada iwalo auli, iwalo, ‘Ebe natumwone ulabahidi alomauna ivetauloina tautuwa ainai’. Teina ainai tahanapui moiha ebeha hedahedadaone nigele yadi paihowa namwanamwana bo yababana aidiyena iyavesinuwaedi na hesi yana waloyemidi ainaena, wuwuna Yaubada nigele tomowa yadi paihowaena iyavesinuwaedi, na hesi ibom yana nuwatuwuwena. 13 Dova hinage Yaubada iwalo mahalava Buki Veꞌahihi ainai, iwalo, ‘Yakobo yavelauwei, na hesi Iso yataꞌwataꞌwataei’.

14 Ainaena hava mata tawaloweine Yaubada yana paihowa teina vehabana, ebeha nigele dumwaluna, bo? Nigele! 15 Wuwuna Mosese yana loina ainai, Yaubada iwalo:

‘Ebe teya nuwanuwagu yaꞌatemuyamuyaei mata yaꞌatemuyamuyaei,
hinage ebe yaiya nuwanuwagu yavelauwei mata yavelauwei’.
16 Teina ainaena iveꞌitagita ebeha Yaubada yana velau nigele iyamahamahalava awawa, tomowa yadi nuwatuwuwo bo nuwana yadi paihowao aidiyena, na hesi ibom bada yana atemuyamuyaena. 17 Na teina hinage ehebo abaꞌita Itipita yadi tauwasawasa ainaena, wuwuna mwalona Yaubada yana walo Pelo vehabana, iwalo, ‘Yavetowologo ta owa tomowa mwalaꞌina wuwuna ebeha alimwena yagu wahiyala yaꞌabiye mahalava yo hinage yehagu uꞌabiye dabalala baleꞌu tupwa maudoina aidiyai. 18 Eeta moiha, ebe Yaubada nuwanuwana na yaiya iꞌatemuyamuyaei mata iꞌatemuyamuyaei bada, na ebe yaiya nuwanuwana na iꞌabiye tui mata iꞌabiye tui.

Yaubada yana modiꞌini yo yana atemuyamuya

19 Nuwana tupwamiu omiu ginauli teina vehabana amnuwanuwatuwu, ebeha maudoida yada mumugaone Yaubada yana vesinuwaena, hava yede vehabana iveꞌewaigita? 20 Augeluwo, ita havena teina dova Yaubada taꞌuluꞌulumiyanei, dova walata ana tauꞌabi, ehebo hauga towahonane walata iꞌabidi, na ehebo walata tauꞌabiwa iwalo auline, iwalo, ‘Hava wuwuna nigele uyaꞌabigau dova augelune?’ 21 Na hesi ana dumwalune neta tauꞌabi walatane ibom yana paihowa iloinaei, ebe nuwanuwana na toputopu ehebonane ainaena walata bwau iꞌabidi, ehebo ana ita namwanamwana na ehebo nigele. Ibom abo iloiloina.

22 Yaubada hinage dova yana paihowa ibom iloiloina, na hauga maudoina tauyababa aidiyai iꞌalaꞌalamaꞌiꞌita mwalaꞌina, na yadi yababa nigele iyaveuveuyodi, ta yana modiꞌini yo yana wahiyala hiyaꞌita. 23 Hinage nuwanuwana na yana wasawasaone mugai iꞌatububunidiꞌo ita ivesinuwaegita vehabada, ebeha yana atemuyamuya iveꞌitagita. 24 Eeta boda bwau aidiyena iyogaegita, Yudeya alimaiyena, na omiu nigele Yudeya alimiyena. 25 Dova tauwalo mahalava Hoseya yana Buki ainai iwalo mahalava, iwalo:

“Tomowao hiya nigele yagu bodao yayogaedima ta yagu boda ainai hiluwu,
wuwuna mwalona nigele yagu velau ainai hiyamiyamiya,
na teina hauga bada yavelauwediꞌo.
26 Na dalavanane ainai Yaubada iwalo aidiyai, iwalo:
Omiu nigele yagu bodao,
mata walonane hibui ta hiyogaedi hiwalo,
‘Hiya Yaubada Miyawahina natunao!’.”
27 Aisaya hinage dova Isileli vehabadi iwalo mahalava, iwalo:

“Howola abo Isileli bodanao idabalala dova namonamo leꞌawai,
na hesi mata aidiyena vihavihadi Yaubada ilauyeyawahaidi.
28 Wuwuna Bada mata baleꞌu maudoina ilaumehesabu mwayamwayauwei”.
29 Dova hinage mwalona Aisaya yana walo, iwalo:

“Yaubada ibom Tauwahiyala,
ainaena ebe nigele teya ada mumuga iyaꞌatemuyamuyaedi,
mata maudoida imutugita,
dova Sodoma yo Gomola maudoidi iꞌoiye mwalowoidine”.

Isileliwo nigele hiyayemidiyei

30 Teina ainaena tahanapui ebeha nigele Yudeya nigele hiyatowotowoi ta ebeha Yaubada iꞌawa dumwaluwedi, na hesi yadi yemidi aidiyena awadumwalu hilobalobai. 31 Na hesi Isileliwone hiꞌaiꞌaipate ta ebeha loina ana awaꞌabi ainaena Yaubada iꞌawa dumwaluwedi, na hesi hiꞌaiꞌaipate ahaya. 32 Hiya yadi nuwatuwu ebeha yadi paihowa vehabana mata Yaubada iꞌawa dumwaluwedi ainaena, ta nigele hiyayemidiyei. Neta yadi lauhapuli dova gaima ainai hitupatupa. 33 Eeta Buki Veꞌahihi ainai vehabana iwalo:

“Amꞌita avivinigomiu wuwuna gaimane mata Saiyoni ainai yamwauwi,
na tomowa bagibagilidi ainai hibeꞌu,
na hesi ebe yaiyadiwo ainai hiyemidi, mata nigele hinimaya hiyalobai”.